Khamoshi Ka Shor Mujhey Bardasht Nahi Hotaa…

us shaksiyat ki baat kya jo man ke taar chhedd dey,

uski talaash hi ko bas  mili hameyN hai zindagi,

dil dhhudhhata usko hoga rooh talaashati usko hogi

thak ke so bhi jaayeN to bhi justjuu uski rahegi!

ghamoN se kuchh nijaat paa jaayen dua kijey,
aur kuchh na bhi sahii jab tab mila kijey,
itne paltey haiN gham nanhey se is dil meiN,
do chaar uchhal jaayeN to kyoN gilaa kijey!

wo paraya rahey achcha hai, jo mera ho jaaye,
muflis huuN itni daulat rakhana kahaaN aaye!

ashq to rokey rahuuN dil bhar aaya to mushkil hogi,
sar jhuka ke sajda karuuN na utthhaa paaya to mushkil hogi!

boht zakhmi dil dekhey, roye har key saath ham,
jab number hamaara aaya to paas tak na aaya koi!

rona hamaara na sahii unkey kaam aaya,
hamney jee khud ka zaroor halka banaaya!

waaroN se bachatey bachaatey zindagi jeetey rahey,
ab jaana ke nishaaney pe kabhi ham they hi nahi!

chaah thi kisi tarah rooh ko kuchh aaraam aata,
dil laga tumse raha kahaaN koi bachaney paata!

ik khoobsuurat baat kah do jhooth kah do to kya hua,
main iske sahaarey  jee utthuuNga ik baar phir haNsta hua!

chalaaiye teer par nishaana galat hai,
dil mera zara bayiiN taraf hai!

maut aisi hogi apni ke chhiDDakey jo koi ik qatra e muhabbat,
to phir sey ik baar umr puuri jee kar ke dikha deNgey ham!

dil lag toH jaaney do zara dukha bhi lena uske baad,
Khalish ke saath dukhata hai jo dukhega sukuuN ke saath!

dosti nibhaayi khoob bichhrhhaney ki baat na karo,
chot khaya dil hai zakhmoN pe waar na karo!

dekha sabhii ne hoga par jaanaa kisi kisi ne hai,
jo jaanata hai mehboob ko sabkey pahchaana usi ne hai!

khyaloN ki duniya pichhey chhuti ab aalam e bekhyaali hai,
barhh chala hai jo raah e khuda pe wo faqat ek sawali hai!

Baha jo khoon to wo ibaarat likh dega ke,
jisko parhh ke mohabbat bas bahadur kareNgey!

khamosh mat hona kabhi qareeb aakey,
khamoshi ka shor mujhey bardasht nahiin hota!

dil se juDD jaaiye zanjeer ki zaroorat kya hai,
ho jaayeN do ek jab baandhaney ki zaroorat kya hai!

dil ki basti khyaaloN ki duniya kiske kaam aayi hai,
bharam tutataa hai jab kabhi hoti bas tabaahi hai!

ham bah chukey aaNsuoN ke saath apne,
ab baarishOn se hameyN kya waasta!

jo lagaaney se lagati hai aag usey aag kya kahiye,
aag wo hua karti hai jo paani daalo to bharhhak jaaye!

aapka khat mil jaata to bhi rotey hotey,
na mila to ham zara khul ke ro liye!

dard ‘gar gulaabi ho to tthahar jaata hai,
cheekh nikal jaaye to adha hua jaano!

waqt bhar dey jo har zakhm ik aisi dawaa hai,
yaadeyN daagh ban ke rah jaayeN ye baat juda hai!

tarhap jaatey haiN jab yaad teri aati hai,
hameyN aati hai tumheyN kyoN nahi aati hai!

Jab qaid meiN dil tha bura haal tha barhaa,
Ab muntashir hai dil to bhi achcha nahiiN hai!

muhabbat kijiye na kijiye ik mehrbaani kijiye,
seat bajoo ki khaali ho to baitthaney dijiye!
(Ek bas meiN likha dekha)

Mere dil meiN jo dard haiN wo kism kism ke haiN,
apna diijiye mujhey aur man pasand le jaaiye!

gham ki tasweer hue ham to kya hua,
tum hamaari har khushi ka baais ho!

Mere dil se nikli har aah to #ibaadat hui,
Khuda ne suni tumney nahi ye buri aadat hui!

wo qatil haiN agar aalaa ham bhi marney meiN maahir haiN,
chalaayeN teer jo aankhoN se to ham bhi zinda haazir haiN!

terey kuchey meiN aayeNgey kuchh waqt ke rahtey,
rokogey ya kar dogey rukhsat alvida kahke!

zamaaney ki baatey kartey haiN to kyoNkar haNsey zamaana hampe,
khud ke gham pe rotey haiN to haNsta hai behad zamaana hampey!

roz nayi muhabbat roz nayi wafa,
baDDa achcha usool hai zaalim ye tera!

Dard o gham se yaari hai khushi to ik bimari hai,
Dard o gham to tikata hai khushi baDi bechari hai!

achchey ko achcha kahiye kharaab kahiye kharaab ko,
seerat ko pahchaaniye na suurat ko na naqaab ko!

rukh jab unhoney palataa apna,
lamuhaala ham bhi hue bewafaa!

jab se tashreef laaye haiN wo dil meiN,
ye badgumaaN nashey meiN chuur rahta hai!

muhabbat kii ye bhul kar lii kaash saya bhar ban rahta,
abhi maiN dhundhta phirta huN usko tab wo saath saath rakhta!

dil ki deewaroN pe wo ibaarat likh daali mainey,
ke jisko parhh ke tum ko bhi karaahana hoga!

Dil baDDa rakkheyN ke haar deyN,
iske bagair lekin muhabbat nahi hoti!

Jo dil ki na samjhey usko kya kahiye,
achcha hai bas chup ho ke rahiye!

ik umr guzaar di taalaash mein mainey,
saath bhi rah luuN ik aur jo khuda dey!

muhabbat kartey they wo par waadey nahiiN kiye,
taqdeer aisi mili ke unkey ho key bhi unke na rahey !

Zamaaney ki nazaroN meiN charhhaney ki chaah hai,
kyoN khuda ki nazar sey utaraney ki chaah hai!

Shiqwe kar kar ke kya jee halka karuuga,
Ishq kiya hai isi meiN jiuuNga maruuNga!

dil hua heart aur muhabbat love ho gayi,
kharaama zindagi jaaney fast kab ho gayi!

‘kayar’

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s